Apr 30, 2012

ළමා නිවාසයේ සිට ලියමි... [අනාථයාගේ කඳුළු]




*** 
වැදුමට හැකිව හදනට බැරි වූ ලප                 ටී
පොඩි  උන් සමඟ අපි මෙහි වෙයි මුල සිට     දී
මව් පිය නැතිව නැත ලොව කිසිවෙකු බිහි     වී
කොයිබද මව්නි ඔබ අප හැර ගියෙ පෙර       දී

නලවන් නැතිය අප හඬනා විට එකෙ          කූ
මැනලයි අපිට කිරි දෙන්නේ මුන් මසු         රූ
                  නැත කිසි දෙයක් අප හට උපතින් ලැබු       නූ                  
     පින්මද පුතුන් වෙද අපි ලෝකෙට නිස        රු...?
 

***
~ අනාථයා වෙනුවෙන් මාතරේ...

Apr 27, 2012

වත්තෙ නීතිය සහ සිත්තියාගේ කඳුළු...




සිත්තියා සුර දෙවඟනේ...
දෑස නිල්, දිගු වරලියේ...
ලැයිමෙ ගෑණුන් පදේ හැදුවද,
මොකද අඬ අඬ කළුවරේ...?

රැඳෙන නිතරම උඹ වටේ...
වත්තෙ කොල්ලන් හැතිකරේ...
නැද්ද උන් ගැන උඹට ගානක්,
අගුල දාගං ලී දොරේ...

තට්ට තනියම උඹ පැලේ...
කොහෙද උඹෙ මිනිහා ගියේ...?
වත්තෙ ලොක්කන් මාරු කෙරුවද,
ඌව ඈතට කඳුකරේ...?

මීදුමෙන් පිරි ගොම්මනේ...
බංගලාවට උඹ ඇදේ...
පැදුරෙ නැති සැප මෙට්ටෙ දෙනවද,
සින්න දොරයගෙ කාමරේ...?


මිට අවුරුදු එකහමාරකට පමණ පෙර යහළුවෙකු සමඟ රාගල පිහිටි තේවත්තකට ගියෙමි. එහි සුපිරින්ටන්ඩන් වරයා මගේ එම මිතුරාගේ සහෝදරයාගේ මිතුරෙක් වේ. එහිදී ඌ කිව් මේ කතාව මගේ හද පසාරු කරන්නට සමත්විණි. ඒ වෙලාවේ ඔහුට මුවින් නොබැන්නත් සිත ඇතුලින් වෛරයක්‌
සමග මෙම ගැහැණිය පිලිබඳ අනුකම්පාවක් හට ගැනුනි.මෙහි සඳහන් කර ඇති සින්න දොරේ මා පෙර කිව් සුපිරින්ටන්ඩන් වරයා වෙයි. කවියේ සඳහන් සියල්ල ඇත්තටම සිදුවූ දේවල්ය, බොහෝ විට දැනුත් සිදුවෙමින් පවතිනු ඇත...

~ මාතරේ

Apr 26, 2012

ලැම්බට්ට කෙල්ල කියූ කවි...



මෙය  ලැම්බට් කියූ කවි වල දෙවෙනි කොටස වේ...
 

මල්ලි මේ ටික,
                       හොඳට අහගන්..!
                       ඉතින් නාඬන්,
                       කඳුළු පිහගන්

අපි අපිට කිසි, 
                      දිනක හිමිවන් 
                      නේ නැති බවත්
                      හිතට අරගන්

අනික මේවට, 
                     ලොව වෙයි හරස් 
                     උන්ගෙ උල් ඇස්
                     නගයි උදහස්

ඉතිං අපි වෙමු,
                    හොඳම මිතුරන් 
                    එය උතුම් වෙයි 
                    පෙමට වැඩියෙන්

***

දන්නවද ඔබ, 
                   පෙම කිමදවත් 
                   එ ' දෙන සොම්නස්
                   එ ' දෙන දොම්නස්..?

නොදැන එහි තතු,
                   ප්‍රේම නොකරන්
                   ප්‍රතිඵලය වෙයි 
                   භයංකාරන්..!

යන්න පෙර මම, 
                   නැගිට මෙතනින් 
                   දෙමි උපදෙසක් 
                   මහද පතුලෙන්

දකින සැම හට,
                   පෙම නොපුදපන් 
                   බොට එපා වෙයි 
                   ඒ වචනයත්...!

Apr 25, 2012

ලැම්බට් කියූ කවි...




පෙනෙයි දුර සිට,
                    බලන බැල්මන්
                    කොමල රැඟුමන්
                    සිනහ රන්වන්

සිතෙයි මා හට,
                    ලඟට ඇවිදින්
                    අතින් අල්ලං 
                    ඉන්න දිගුකල්

නුබෙ සොඳුරු සිත,
                    වසඟ කරගත්
                    එහි අරක්ගත්
                    කෙනෙක් නැතිනම්

කුමරි දෙනවද,
                    මටොබෙ නිකැළැල්
                    දිලෙන මිණිවන්
                    අදර හසරැල්...?


***


ගොතා  කියනෙමි,
                    කනට පැණි වන්
                    හදට කපු වන්
                    මියුරු පදවැල්

ළඟ ඉඳින්නෙමි,
                    දිවි තියෙනකල්
                    දෑස ලෙස මං
                    රකිමි සැමකල්

සිතින් තනනෙමි,
                    නිම්න නිල්වන්
                    අපි ඇවිද යං
                    කතා වල මෙන්

එහෙත් මේ කවි,
                    ගඟට ඉනි මෙන්..!
                    මටොබ අක්කෙක් 
                    උනේ ඇයි බං...?


       

Apr 24, 2012

දුක කියන දේ ලේසියෙන් නැතිකරගන්න බේතක් සොයා ගැනේ..!







දුක... දුක කියන්නේ අකුරු දෙකේ සරල වචනයක් උනාට දුක විඳින්න උනාම ඒකෙ සරලත්වයක් පේන්න නෑ..! අපිට කොයි වෙලාවේ මොන වගේ ප්‍රශ්නයක් එයිද කියල කව්රුත් කියන්න දන්නේ නෑ!!! මේක ලියාගෙන යනකොට "දුක" කියනේ වචනේ වෙනුවට "ප්‍රශ්න" කියන වචනේ හොඳයි වගේ දැනෙනවා... ඉතින් අපි ඒ වචනේ යොදමු... ප්‍රශ්න ආපුවම හුඟක් දෙනෙක් තමන්ව දාල යනවයි කියන එක තමා පොදු මතය.. එහෙම වෙලාවට කව්රුත් මගේ ළඟ නෑ කියල හිතෙනවා... ඔව් සිරස FM වත් ළඟ නැතිවෙන වෙලාවල් තියෙනව....

ඉතින් ඔය වගේ ඕනෑම ආකාරයක ප්‍රශ්නයක්, සිත් තැවුලක් ආපු වෙලාවක ගන්න පුළුවන් බේතක් ගැන මම දැනගත්ත... අපේ ඉස්කෝලේ නේවසිකාගරේ මම ඇතුළුව කට්ටියකට ගොඩක් ලොකු ප්‍රශ්නයකට මුහුණ දෙන්න සිද්ද උනා.. ඒක කොච්චර ලොකුද කිව්වොත් අපේ දෙතුන් දෙනෙක්ට ඉස්කෝලෙන් අස්වෙන්නත් සිද්ද උනා... ඉතින් ඔය කියන කියන දවස්වල අපි හිටියේ ගොඩාක් ප්‍රශ්නවලට මැදි වෙලා.. හිතේ බයෙන් සහ දෙගිඩියාවෙන්.... හැබැයි අපේ බෝඩිම බලාගන්න සර් හොඳ මනුස්සයා... එයා ඉස්කෝලේ සර් කෙනෙක් උනාට හැම වෙලාවේම වගේ ගත්තේ ළමයින්ගේ පැත්ත... ඉතින් සර් අපිට බොහොම හොඳ දෙයක් කියල දුන්න මුළු ජිවිතේටම එන ප්‍රශ්න වලදී මුහුණ දෙන්න පුළුවන් විදියට....
 

සර් කාලයක් වැඩ කරල තියෙනව උගන්ඩාවේ.. ඉතින් ඔය රටේ රස්නෙයි, ආර්ථික දුෂ්කරතායි මැද්දේ ගොඩක් ප්‍රශ්න තිබ්බ කාලයක්ලු... ඒ දවස්වල ඔය ඉඩි අමීන් එහෙම පාලනේ කරන කාලෙනේ....මේ සර් එක්ක වැඩ කරන ජපන්නු තුන් දෙනෙක් ඉන්නවලු හැමවෙලාවෙම ෆුල් සොමියෙන්....උන්ටත් ප්‍රශ්න තිබිල තියෙනව... හැබැයි උන් කිසි ප්‍රශ්නයක් ඔලුවට ගන්නැතුව ආතල් එකෙ ඉන්නවලු... ඉතින් අපේ සර් උත් මුන් එක්ක ෆිට් උනාලු... ඉතිං කාලයක් ජපන්නු එක්ක ඉද්දි මේගොල්ලන්ගේ සතුටින් සිටීමේ රහස සර් දැනගත්තලු.... රහසක් කිව්වට ඒක මේ පුංචි පුරුද්දක් වගේ. මුන් තුන්දෙනා වැඩ ඉවර වෙලා නිමාඩු හම්බවෙන වෙලාවට ඇවිදින්න යනවලු කැලේ පැත්තේ... ඒ යන්නේ වතුර තියෙන තැන් හොයාගෙන.. ඉතිං වතුර තියෙන ඇලක් හරි වතුර වලක් හරි හොයාගත්තට පස්සෙ මුන් වතුරේ බැහැල ඉන්නවලු පැයක් විතර... ඉතිං ඔය පැය දෙක තුනේ උන්ගෙ ආගිය තොරතුරු කතා කර කර කාලේ කනවලු.. ඉතිං බලං ගියාම මේක තමයි මුන්ගේ සතුටින් සිටීමේ රහස.....                                                 

  වතුර

වතුර කියන්නේ මහ පුදුම දෙයක්.. මිනිස්සුන්ට වෙන මොනවා තිබුනත් වතුර කියන දේ නැතුව ජිවත් වෙන්න කොහෙත්ම බෑ... වතුර වලට වෙන ආදේශකයකුත් නෑ... ඒක හොඳටම තේරෙනවා ගොඩක් තිබහ වුනු වෙලාවක ගිහින් බීම එකක් බිල බලන්න වතුර තිබහ යනවද කියල... එකෙන් වෙන්නේ බඩ පිරෙන එක විතරයි.. එතකොට තව වතුර බොන්න හිතෙන්නේ නෑ.. මිසක් ඒකෙන් වතුර තිබහ යන්නේ නෑ...

වතුර ගැන කතා කළා ඇති.. ඉතිං ඔය ක්‍රමේ අපිටත් හරි ගියා.... අපි වතුර වලවල් හොය හොයා කැලෑ ගානේ ඇවිද්දේ නෑ.. අපි ගිහින් හොඳට නා ගත්ත බෝඩිමේ බාත්රූම් එකෙන්...  ඔව් පැයක් එකහමාරක් විතර එකදිගට නෑව.. කිසිම ලෙඩක් නං හැදුනෙ නෑ... 

ඉතිං මොකක්හරි ප්‍රශ්නයක් හරි සිත් තැවුලකට හරි මැදි උන වෙලාවක යන්න ලඟම තියෙන ලිඳට හරි බාත්රූම් එකට... ඇලක් හරි වැවක් හරිනම් ගොඩක් ශෝක්.. නාන්න ඇඟේ හැමතැනක්ම වතුරෙන් තෙත් වෙන විදිහට.... පැයක් දෙකක් හරි කමක් නෑ.. සමහර විට ඊට වැඩි වෙන්නත් පුළුවන්.. එක්කෝ ඔබේ සිත් තැවුල දුරු වෙලා සහනයක් ලැබෙයි නැත්තම් ප්‍රශ්නෙට පට්ට විසඳුමක් පහළ වෙයි..!

                                                           අත්දුටුවයි! සත්තයි!

Apr 22, 2012

සියඹලා ජූස් සෑදීම!!




මේපාර සයිබර් සැණකෙළිය නං එලටම තියෙන්න ඇති නේද?? අපිට ඉතින් හෙට ඉස්කෝලයක් කියල දෙයක් තියෙනවනේ යන්ට... නැත්තන් ඉතින් බුදියන්නෙත් ඔහෙම තමා...

කොහොමින් කොහොම හරි ටොපික් එකට එන්ටර් වෙමු.. සියඹලා ජූස්! ටිකක් මොනවද වගේ නේ??

මේක මම ඇහුවේ පබිලිස් අන්කල් ගෙන්ද කොහෙද!!! මිනිහ ඉතින් හදන්නැති කෑමක් නැනේ.. වට්ටක්ක පුඩිං උත් ලඟදි කියල දෙනවා ටීවී එකේ දැක්ක... 

ඔන්න එක්කෙනෙක්ට සියඹලා ජූස් හදන්න ඕනා කළමනා ටික මෙන්න...

1. සියඹලා මද 4ක් විතර
2. කෝප්පයක්
3. වතුර
4. සීනි
5. ලුණු

සාදන ක්‍රමය ඇවිල්ල පොඩ්ඩක් විතර ජුගුප්සාජනකයි...

හරියට  නිකන් අලුතින් හදන ගෙදරක ඔය හුණු වලින් ලියන එව්ව වගේ...

***
මෙම  නිවසට බුදු සරණයි!

මොනවද බලන්නේ?

බලාගෙන බෙල්ලෙ පොට යයි!!

***


ඉස්සෙල්ලම කෝප්පෙකට කාලක් විතර පිරෙන්න වතුර දාන්න... දාල ඉවර වෙලා සියඹලා මද ටික කෝප්පෙට දාල හොඳට මිරිකගන්න... මදේ ඇටෙන් ගැලවිලා.. මදේ දියවෙලා යනකන් අතෙන් මිරිකන්න...

හරි.. ඊට පස්සේ ඇට ටික කෝප්පෙන් අයින් කරලා.. සීනියි ලුනුයි එක්කර ගන්න... සියඹලා ඇඹුල් නැතිවෙලා හොඳ පැණිරස ගානට එනකන් සීනියි ලුනුයි එක්කරගන්න... එච්චරයි ඉතින් හදනවා කියල කරන්ට තියෙන්නේ.... හරියට ලුණු ඇඹුල් මික්ස් උනොත් එලම එල සියඹලා ජූස් එකක් හැදෙයි... 

මේක  බීමක් වශයෙන් එතරම් ප්‍රසිද්දියක් දරන් නැති හන්ද ඕනේ නං පොඩි අදායම් මාර්ගයකට එන්ටර් වෙන්නත් පුළුවන්... :ඩි





Related Posts Plugin for WordPress, Blogger...